كلمة المقدمة
كاتب الموضوع ما زال اعزب تم تجيمع كل المفاهيم من تجارب بعض المقربين المتزوجين وقراءة للشارع السوداني
ملحوظة الكاتب ما (زال) اعزب
لمن تتوفر لديها المواصفات الغير سودانية الرجاء ارسال رسالة خاصة
*******************************************************


المرأة العصرية .. ترجمة سودانية
اقر كثير من علماء النفس ان الرجل بعكس ما تناقل عبر الأجيال يحتاج إلى زوجة قوية زكية مستقلة
اما النظرية القديمة فان الرجل يحب المرأة بدون شخصية
وهنا لا نتكلم عن صفات المرأة الأنثوية بشقيها السالب والموجب سنتطرق للموضع لاحقا
(الرجل يحتاج المرأة القوية الذكية )
قد يكون الاختلاف في النظرية بتغير الأجيال والعلم عند الله وظروف الحياة ومتغيراتها
المرأة القوية : هي التي تجدها معك في كل ظروف الحياة القوة .قوة الشخصية والسيكولوجية التي تشكل حضورها ولا تحصر وجودها في مسارات محددة
ان نظرنا الى كل الصفات نراها تتصل ببعضها في اشكال عدة :الشخصية والقوه الحكمة يمكن ان تفتح أي باب من تلك الابواب وتجد الف باب في انتظارك للتفاصيل المملة
ولكن نتحدث عن الترجمة السودانية البحتة لكل ما زكر
البت السودانية في سبيل فرض وجودها تحاول ان تتطرق لكل الشخصيات والصفات بطرق عدة
القوية: لو قال يمين قولي ليه شمال ما تباريه في قولو . القوية عندنا تساوي العندية اذا هو بتباري فهم واحدة بتمليك تعملي شنو من اساليب عناد او نكد او غيرو لمجرد توضيح فكرة انها زو شخصية قوية اصلا لمجرد التفكير في مجاراه الفهم دا ضعف في الشخصية
المتنوعة : التنوع عند النسوان الثياب والهدوم والملايات كل ما كثرو هي متعددة
التنوع هو في الحياة وعدم الحصر في تصرفاتها عموما المرأة بتحب البروتكول وفي كلامها البتقولو بتحب التنوع

المراه الحكيمة : كلمة واضحة بس اجي لي معناها عندنا العبيطة
الحكيمة : اسمع نحنا مفروض نلم لينا قرشين للزمن اصلو ما معروف البحصل شنو لي قدام يعني انت مرتبك يادبو للمصاريف وايجار البيت نعصر على روحنا شوية عشان نلم لينا قرشين في النهاية ساترين حالنا .. بعد خمسة دقايق .. اسمع بي المناسبة دايرة لي قروش اغير دهبي وبعدين طالعة السوق والله ملايايتي ديل بقن قدداااااااااام وكاشفات حالي وفي مناسبة بت عمي دايرا لي توب .. وقروشي بتاعة الشهر بتاعه التلفونات خلصت امس نقوطع انا وبت عمي في شمارات العرس .. وداير لي قروش اواجب بيها كمان .. انت العيد دا ما قرب اها دايرين نغير لون البيت نضربو بوهية والسيراميك دا زاتو شايفا لي اتنين اتكسرة نقوم نغير شفت لي تشكيلات جديدة نزلت مباااااااااالغة عملوها ناس فلانة في بيتهم الجديد وووووووووووووووووووو

دا ما غباء لكن حكمة مستطنعه تهميد لي الطلبات او
جد جد غباء

يتبع قريبا

كتب atefgafar


كل زول يجي خاشي يعمل كوبي بيست الجكومة لو جات بحزف الموضوع

اكبر عدو للمرأة في العصر الحديث التلفزيون المرا تكون قاعدا مع راجلها
تجي سوكرتي السيف لحاظها هلكني الزول يتململ في كرسية والمرأة بي طبعها اول ما تشوف مرأة اجمل منها اول شي بتعاين لي ردة فعل راجلها . . وتلاحظ ملامحة وعيونو في الشاشة بعاينة ونظرة لا تخلو من شيء من بلاهة او اندهاشة
ومعظهم بتزمرو من النقطة دي سواء في على حدود الشاشة البلورية ولا الحياة العامة في حفلة ولا غيرو مما يدخلو الحفلة المراة تعمل بي نظرة مسح جيولوجي على المكان لو ما لقت اي جمال خارق تفك الراجل وتمشي تقوطع
اما لو نتيجة المسح النظري ادى الى وجود عنصر جمالي فمن اللحظة دي هي كراعها في كراعو
ليهن حق يتزمرو عملية ما جميلة ولا اخلاقية ولا تربوية
نقول لرجال غضو البصر لو ما عشان نساوينكم عشان دينكم


مشهد جانبي:
البت تجري مواعيد المسلسل جات .. وب علي الليلة مهند عامل نيو لوك .. الله يجازيها نور عايني حالتو كيف
تتصل على صحبتها
اها حضرتي الحلقة .. اي مهند ما بفوت ليه حلقة
اريتو رجالنا يتعملو منو
شفتي عملي ليها شنو شفت كان لابس شنو شفتي شعرو كيف ... الخ

عانساتي .. كما تدين تدان
لو سالت مرا تقول ليك حسي انتو ما بتعاينو
عاينا لو غلط هل الغلط بي الغلط
في راجل جا قال لي مرا تعملي لي زي فلانة الفي المسلسل دا

امكن الرجال بعاينو وغلطانين لكن انتو بتعاينو وتحلمو وبتطالبو بي تحور كل الشخصيات لي الشخصية الرومانسية الغير واقعية في حياتكم
وغض البصر للزكر والانثى


وكما قال المتنبي
لو قايلة ريدتنا زي مهند ونور تبقي غلطان ودايرا ليك دكتور
حسي يا منقة انتي عايشا الدور .. حسي بي الزمة انتي بتشبهي نور
نواصل قريبا المسكوت عن الحريات والمرأه ضد حريتها

تخريمة
البلد دي شكلها كلها ترجمة سودانية
مافي اي عرض من بدون ترجمة
لسا عازب وراجي

صباح الخير على الجميع
و سعيدة جدا اكون جزء من عالم مدهش (ميدرس )

غايتو انا معاك يا محمد في انو المرأة السودانية بعيده جدا عن الواقعية في بعض الحاجات (ما كلها عشان باقي البنات ما يزعلو)
يعني اول حاجه مهند شنو الانا كل ما يبدا المسلسل اقعد اتنح فيهو.. ؟؟؟انا عن نفسي ما شايفه فيهو سي زايد عن اي راجل تاني
انا شخصيا ما شفتا المسلسل ده ولا عارفه القصه شنو لكن حسب الفهمتو يا معشر الرجال انو التخلع البيتخلعوه الجكس على هذا المهند ما على زرقة عيونو ولا في شقار شعرو، الفكره في تعاملو و رومانسيتو ( كما سمعت من المتابعات للقصه الفارغه دي)

و عشان نكون واضحين و نبعد من المسلسل التركي، المرة السودانية فعلا مفصولة عن الواقع تماماً يعني كيف تكون دايره راجلها يتقطع و يتغزل فيها ليل نهار و يدخل عليها من الشغل بباقات الورد و الياسمين و هو جاي من شغلو بالمواصلات و شمس الصيف في نص راسو و الماهية خصمو منها 50 جنيه لدعم الشنو ما عارف داك و قصص تانية كتييييرة

كلنا كبنات دايرات الراجل الرومانسي، لكن بشوية منطق وواقعية ، يعني بالنسبة لي لو الراجل اتذكرني في نص النهار بي تلفون ولا رسالة من غير ما يكون عندو موضوع ( يعني ما داير يخلعني بانو عزم المكتب كلو على الغدا ولا مصيبة زي دي) بس لمجرد انو يسال عن الحال دي حركة حلوة منو، و كون انو يتذكر يوم عيدملادي من غير ما اذكرو برضو حلوة، و لو جا داخل علي شايل معاهو شوكولاتاية ولا بسكويت عشان داير نشرب شاي المغرب سوا ، ولا لو عيانة يتصرف يتغدى بطريقتو ولا يا حبذا لو جاب غدا من بره ( ما كل يوم,,, بس يوم اكون عيانه و دايره اموت)

حاجات كتيره ممكن الراجل يكون بيها خطير و رومانسي من غير ما يكون مهند
و لينا عودة عشان الكلام كتير

احي الناس العصرية بلا ترجمة
اول شي طلع مهند ونور فيرشن تو
اللي هم عمار ونيرمين
هاهاها نحنا من خطر الاستيطان الانجليزي
لي الحكم التركي

رئيس مملكة التتي عموري
الاميرة الحسناء نيروو

ادي المرأة حريتها واستحمل العواقب

نصيح ختها في شحمات اضنين وفي رموش عينيك وعلقها ورقة وارسمها في عربيتك


طالما اصلا الزول اختار شريكة حياتو معناها مفروض واثق فيها ومن عقليتها ومن فكرها وفهمها
الموضوع بكون ظاهر في علاقات حتى غير المتزوجين
مما تبدى العلاقة تبدى الحدود طالعا وين وترويني وتكلميني ولابسا شنو
ضرب من ضروب المراهقين وكلام شفع ساي لفرض السيادة
بعد الزواج دي بتكون واجب ديني على المرأة لي ولي امرها دينينا وما فيها اعتراض
لان بنفس النظام الكانت البت فيه مع ابوها بتنتقل في الرعاية لي زوجها
ما هدف موضوعنا ولا ظليع في الدين عشان ادخل في النقطة دي

النقطة في طالما في ثقة ومعلوم الوعي بتاع البت وفهمها الاخترتها بيه قبل العلاقة او الزواج فيه النهاية اخترت صح
المرأة البتطالب بي الحرية بتحب عدم الحرية في النقطة دي بي الذات
لو خليتها على راحتها وحسب فهمها المنطقي تعمل الدايراهو بعد فترة بتحس بي عدم الاهتمام
عشان تهتم بيها مفروض تكون متاعب انها بتعمل شنو ولابسا شنو وتعترض وترفض وطالعا مع منو وتعترض وترفض
عشان السيدة الانسة تحس انك بتغير عليها
لو ما بتغير عليها = انت ما بتحبها
وممكن تعمل اي شي تقصد تمشي تلبس لبس وتجي توصفو ليك ولا تجي بيه الحفلة عارفاك بتجي فيها عشان تعترض وتحس انك بتغير عليها
ورغم الممانعة بتاعتها .. تكون اسعد سعيدة
لانو حضرتك غرت عليها
ولمن تنق ليها في اي شي وكثرة الخناق انت معقد شديد
ولو جيت تاني رخيت تلقاها ترجع لي نفس الحركات زي الطفل الصغير لمن تمنعو من شي كل شوية شوية يقرب ليه لمن يشوف ردة الفعل ويعرفها في الحالة دي هي عارفا ردة الفعل لكن محتاجاها عشان تحس انك غرت عليها (انك بتحبها )
وفي نفس الحظة عند الراجل ما بكون بفكر في غيرة ولا خلافو بفكر في انو الزولة الاختارها بي عقلو وكان شايفها كاملة مجرد مراهقة او ما عندها التفكير او او .. وبيبدى يحدد الحريات .. ماشا وين مع منو لابسا شنو
ديك فرحانة انو بغير عليها
وهو بتحسر على خياراتو





فعلا المرأه كأن مفكر حكيم ... الحكمة دي ح تدخلنا الجنة ان شاء الله

هيييي انت برضو بقيت متابع عمار؟؟؟ عليك الله حصل شنو الليلة ما حضرتها ياخي عمار دا غير شكل اححححح

المهم ألقيت نظرة سريعة على الموضوع (عشان انت عارف النظر مع الليل بحصل ليهو شنو ) ووقعت لي في جرح حكاية خوف الرجل من المرأة المثقفة القوية العاملة ... إلخ الحكاية دي بجد حاصلة وبنشوفها كتير.. في الاول ممكن يكون شايفها مناسبة واي حاجة اول ما يعرف انها ماشة كويس في شغلها او مستقبلها ممتاز يكب الزوغة

وبعضهم يعملوا فيها شخصية مثالية ومتفهمة جدا قبل العرس بعديها يطلع كلام ساي وانا ما بتكلم ساي دا حتى شفتها عند السودانيين وغير السودانيين

إلا من رحم ربي وديل فئة قليلة جدا تكاد تكون نادرة بيكونوا فعلا صادقية وشايفين انو كونها تكون ناجحة في عملها معناتا اكيد حا تكون ناجحة في بيتها وبياخدوا الموضوع بي روح رياضية وبالعكس بيكونوا داعمين ليهاونجاحها من نجاحه والعكس صحيح ودي افتكر دليل على قوة شخصيتهم ونضجهم

المهم بالله اتكلموا لينا في الحتة دي لمن نجيكم تاني

سلام .
شبل لكن سؤالك أسد ....
المرأة : هي حواء , و حواء خلقت من ضلع آدم , فهي للقلب أقرب , و يقال إن إنفعالاتنا تلعب فيها الكبد دور كبير جداً , و برضو الاضلاع قريبة للكبد , و منطقة الصدر هى الاعلى , و كذلك منزلة حواء يجب ان تكون !!
العصر : يعني القرن الواحد والعشرين , عصر السرعة , والفضاء الرحـــــــــــــــــــــــــيب , عصر العولمة والغوغلة , والقرية الإلكترونية , عصر الماديات .
كلما تقدمت البشرية في مادياتها , يجب أن تتأخر لروحانياتها , فالعلم يدعم الإيمان , بكل الكتب السماوية , و الإسلام وكتابه القرآن رائد التجديد , فبرغم قدمه إلا انه سابق لكل الخيال الذي نعيشه الآن , و كل يوم يكتشف فيه العلماء تحقيق لآية , بعد أن ينفق الغرب والشرق الملايين ...
المراة العصرية , هي التي نالت حظها من علم المدراس والجامعات و العلم المكتسب من أهلها وبيتها , بحكاويه , و مشاهده اليومية , فيصبح علماً منقولاً ... هي التي تصهر كل هذا , و تتشربه , فتنمو به أمرأة نخلة - كما يقول الشاعر .
المراة العصرية هي إمراة نخلة , غائصة في مورثها , سامقة التحديات يا شبل يا خوي .

هلا انسة نيري اقصد تعشيقة
دحين صحي مريتي ساي انتي بس عينك وقعت في عمار والباقي طشيتيه ساي
ارجع لي المكتوب بي الاحمر
هاهاها ما تجي لمن عمار ينتهي عشان تجينا مركزة